This is this sidebar for a particular page. It can be edited by editing a page from within the control pannel.
Na Kalou eda qarava e sega ni matakau se didivara. E Kalou bula ko Koya, e vaka daligana, e vakayaloka ni mata, ka vakila na ka, e rawa ka dau veitosoyaki ko Koya. Na yacana, ko Jiova ko Koya ka buli lomalagi kei vuravura ka dau rogoca na noda masu nida kaciva ka masuta na yacana nida gadreva na veivuke mai vua.
E sega ni Kalou cudrucudru ko koya me dau vakararawataki keda, e segai sara, ko Koya edau,lomani keda ka kauwaitaka vakaidina na noda bula na tamata ka vakauasivi nida qarava koya ka sa Tamada vakayalo ko Koya.
Same 34: 4 - 6.
Na Same nei Tevita na Tui e vakaraitaka tiko vei keda na dina e wasei koto e cake.Na Tui ko Tevita e tamata ga vakataki keda, ka bula tiko ena dua na vuravura lutu ka dau levu na leqa ena kena veimataqali eda dau sotava. E sega ni vakauai kina edua na tamata tabuyani, se cava nai tutu ni bula eda tiko kina, se tui, se tauvanua , vutuniyau se dravudravua, loaloa se vulavula, na leqa , rere , taqaya, rarawa, yaluma eda dau sotava kece na tamata eda bula tiko ena vuravura oqo. Na Tui ko Tevita e sega ni vakuai kina ka eda kila ka raica na dina oqo ena nona masu ka kerea na veivuke vua na Kalou ena Same 34 eda Wasea tiko oqo.
Ai matai ni ka e dodonu meda cakava ni sotava edua na leqa sai koya ,koya meda TACAKE VUA NA KALOU KA MASUTI KOYA ( Tikina e 4 ). Meda vakasaqarai Koya ka sega nida veiciciyaki ka kauta wavoki noda leqa vei ira na tamata. Baleta na Kenai sema ni yatuvosa ka tarava e kaya na Tui , E ROGOCI KOYA NA KALOU KO JIOVA KA VAKABULAI KOYA MAI NA NONA RERE KECEGA.
Na Dina koya:
Na noda Kalou e dau rogoca ka dau sauma na masu.
Kenai Karua ni koya, edau veivakabulai ka veisereki mai na noda leqa KECEGA KO KOYA.
Na leqa cava ga, se dua beka na mataqali rere se dredre cava ga eda sotava, se vakaevei na kena levu oqori e sega ni dredre vua me walia kevaka eda vulica na vakararavi vua kei na dau vakabauti Koya ena dau basika ka Dodoka mai na ligana me ia na veivakabulai kei na veisereki ko Koya.
Kakua ni dau yalo lailai niko sotava na veika dredre se leqa, kauta ga mai vua na Kalou na nomu leqa, ko na raica vakaidina na nona vinaka kei na nona loloma ena nomu bula.
Ena tikina e Lima , e tukuna na Tui niko ira era tacake Vua era vakararamataki ka era na sega ni mata madua.
E levu na draki butobuto eda dau sotava ka vesuka noda bula ka eda sega ni raica rawa na noda sala, eda vaka meda sega ni kila na ka e dodonu meda cakava. E vaka nida vakayayamo voli ena dua na gauna balavu ka butobuto tu vei keda na bula. E vaka meda vesuki ka galili ka bikai ena druka.
Ia kevaka eda tacake vua ka kerea na nona veivuke e yalodina tu ko Koya me cilavi keda mai na matana kei na nona rarama.
Ena kauti keda tani mai na noda buto ka eda na sega ni na vakamaduataki. O Koya e Kalou dau vei vakavakagalalataki mai ca kecega. E sega ni dua na ka e dredre Vua.
Ena tikina e Ono, e kaya, ni tagi na tamata dravudravua e vakarorogoko Koya ka vakabulai koya mai na nona Rarawa Kecega.
Na Kalou ko Jiova e dau kauwaitaki ira na dravudravua. Nida vaka dravudravua taka talega na yaloda e totolo sara nona dau rogoci keda mai ko Koya nida masuta na Yacana.
Na noda RARAWA e kila vinaka tu ko Koya. E via colata ka me walia talega ko Koya. Na ka ga meda cakava koya meda Tagi yani Vua. Meda kauta yani vua na noda RARAWA KECEGA ka ena VAKABULAI keda mai na noda Rarawa ko Jiova.
NA TARO OQO:
Na cava ko REREVAKA TIKO SE TAQAYA TIKO KINA ?
Na cava ko Lomaleqa se taqaya taka tiko de ko na mata madua kina?
Na Rarawa cava ko lako curuma tiko ?
NA KENAI WALI OQO:
Tacake ka torova doudou mai na Turaga ko Jisu Karisito ena masu kei na vakabauta ena sega ni biuti iko ko Koya mo colata tu na nomu leqa ka tagi, rarawa, vesuki, yaluma voli tu, tiko voli ena buto.
Kauta mai vua na nomu leqa kecega ena veivakabulai ka vei sereki vakai dina ko Koya.
Lako mai vua edaidai ena sotavi iko vakai dina ko Koya.
Kalougata !
